ಹುಳಿಯಾರು: ಮಾರುಕಟ್ಟೆಯ ಜಂಜಾಟ, ದಲ್ಲಾಳಿಗಳ ಕಮಿಷನ್ ದಂಧೆ ಮತ್ತು ಬೆಲೆ ಕುಸಿತದ ಭೀತಿಯ ನಡುವೆ ರೈತರು ಕಂಗಾಲಾಗಿರುವ ಇಂದಿನ ದಿನಗಳಲ್ಲಿ, ಹುಳಿಯಾರಿನ ರೈತರೊಬ್ಬರು ಅಳವಡಿಸಿಕೊಂಡಿರುವ ‘ನೇರ ಮಾರಾಟ’ದ ತಂತ್ರ ಕೃಷಿ ಲೋಕದಲ್ಲಿ ಹೊಸ ಸಂಚಲನ ಮೂಡಿಸಿದೆ.
ಹುಳಿಯಾರು ಸಮೀಪದ ಕೆಂಕೆರೆ ಅಡಾಣಿಕಲ್ಲು ಗ್ರಾಮದ ರೈತ ಪರಮೇಶ್, ತಾವು ಬೆಳೆದ ನೇರಳೆ ಹಣ್ಣುಗಳನ್ನು ಮಧ್ಯವರ್ತಿಗಳ ಹಾವಳಿಯಿಲ್ಲದೆ ನೇರವಾಗಿ ಗ್ರಾಹಕರಿಗೆ ತಲುಪಿಸುವ ಮೂಲಕ ಮಾದರಿಯಾಗಿದ್ದಾರೆ.
ಸಾಮಾನ್ಯವಾಗಿ ಮಾರುಕಟ್ಟೆಯಲ್ಲಿ ಸಿಗುವ ಹಣ್ಣುಗಳು ಕೊಯ್ಲು ಮಾಡಿದ ಮರುದಿನವೋ ಅಥವಾ ಎರಡು ದಿನಗಳ ನಂತರವೋ ಗ್ರಾಹಕರ ಕೈ ಸೇರುತ್ತವೆ. ಆದರೆ ಪರಮೇಶ್ ಅವರು ಬೆಳ್ಳಂಬೆಳಗ್ಗೆಯೇ ತೋಟದಲ್ಲಿ ಕೀಳುವ ತಾಜಾ ನೇರಳೆ ಹಣ್ಣುಗಳನ್ನು, ಅದೇ ದಿನ ಹುಳಿಯಾರು ಬಸ್ ನಿಲ್ದಾಣದ ಬಳಿ ಗ್ರಾಹಕರಿಗೆ ಮಾರಾಟ ಮಾಡುತ್ತಿದ್ದಾರೆ. ಇದರಿಂದ ಹಣ್ಣಿನ ತಾಜಾತನ ಮತ್ತು ಪೌಷ್ಟಿಕಾಂಶ ಅಬಾಧಿತವಾಗಿರುತ್ತವೆ.
“ಕೃಷಿಯಲ್ಲಿ ಬಂಡವಾಳ ಹಾಕಿದ ರೈತನಿಗೆ ಲಾಭ ಸಿಗುವುದು ಕಷ್ಟದ ಮಾತು. ಆದರೆ, ನೇರವಾಗಿ ಜನರಿಗೆ ಮಾರಾಟ ಮಾಡುವುದರಿಂದ ಗ್ರಾಹಕರಿಗೂ ಕಡಿಮೆ ದರದಲ್ಲಿ ಸಿಗುತ್ತದೆ, ನಮಗೂ ಸಣ್ಣ ಮಟ್ಟದ ಲಾಭ ಉಳಿಯುತ್ತದೆ,” ಎನ್ನುತ್ತಾರೆ ರೈತ ಪರಮೇಶ್. ಕೇವಲ ೧೦೦ರೂ. ಕ್ಕೆ ಒಂದು ಕೆಜಿ ನೇರಳೆ ಹಣ್ಣನ್ನು ಮಾರಾಟ ಮಾಡುತ್ತಿರುವುದು ಸ್ಥಳೀಯರಲ್ಲಿ ಸಂತಸ ಮೂಡಿಸಿದೆ.
ಗ್ರಾಹಕರ ಅನುಕೂಲಕ್ಕಾಗಿ ಇವರು ‘ಹೋಮ್ ಡೆಲಿವರಿ’ ವ್ಯವಸ್ಥೆಯನ್ನೂ ಕಲ್ಪಿಸಿದ್ದಾರೆ. ೯೯೮೦೧೩೫೧೭೮ ಸಂಖ್ಯೆಗೆ ಕರೆ ಮಾಡಿದರೆ ಸಾಕು, ಹಣ್ಣುಗಳನ್ನು ಗ್ರಾಹಕರ ಮನೆ ಬಾಗಿಲಿಗೆ ತಲುಪಿಸುವ ಮೂಲಕ ಆಧುನಿಕ ಸವಾಲುಗಳಿಗೆ ಸ್ಥಳೀಯ ರೈತರು ಹೇಗೆ ಹೊಂದಿಕೊಳ್ಳುತ್ತಿದ್ದಾರೆ ಎಂಬುದಕ್ಕೆ ಇವರೇ ಸಾಕ್ಷಿ.
ಯಾವುದೇ ರಾಸಾಯನಿಕಗಳಿಲ್ಲದ, ಮಣ್ಣಿನ ವಾಸನೆಯುಳ್ಳ ರೈತರ ಬೆಳೆಗಳನ್ನು ನಾವು ಖರೀದಿಸುವುದರಿಂದ, ಕೃಷಿಯಲ್ಲಿ ತೊಡಗಿರುವ ರೈತನಿಗೆ ಆನೆ ಬಲ ಸಿಕ್ಕಂತಾಗುತ್ತದೆ. ಮಧ್ಯವರ್ತಿಗಳಿಲ್ಲದ ಈ ಮಾರಾಟ ವ್ಯವಸ್ಥೆ ಇತರ ರೈತರಿಗೂ ಸ್ಫೂರ್ತಿಯಾಗಲಿ. ಹುಳಿಯಾರಿನ ನಾಗರಿಕರು ಈ ರೈತ ಮಿತ್ರನ ಪ್ರಯತ್ನಕ್ಕೆ ಕೈಜೋಡಿಸಿ, ಸ್ಥಳೀಯ ಕೃಷಿ ಉತ್ಪನ್ನಗಳನ್ನು ಪ್ರೋತ್ಸಾಹಿಸಬೇಕಿದೆ.