ಪಾವಗಡ: ತಾಲ್ಲೂಕಿನ ದವಡಬೆಟ್ಟ ಎಂಬ ಕುಗ್ರಾಮದಲ್ಲಿ ವಯೋವೃದ್ಧನಾದ ಶ್ರೀ ಚಿಕ್ಕಣ್ಣ, 75 ವರ್ಷ ರವರ ಏಕೈಕ ಪುಟ್ಟ ಮನೆ ಬೆಂಕಿಗೆ ಆಹುತಿಯಾಯಿತು. ನತದೃಷ್ಟ ಚಿಕ್ಕಣ್ಣನಿಗೆ ಒಂದೇ ಕಣ್ಣು ಇರುವುದು. ಅವನ ಈ ನಿತ್ರಾಣ ಸ್ಥಿತಿಯಲ್ಲಿ ಇರುವ ಮನೆ ಹಾಗೂ ಅಷ್ಟಿಷ್ಟು ಕೂಡಿಟ್ಟ ಹಣ ಮತ್ತು ಸಂಪೂರ್ಣ ಪಾತ್ರೆ, ಬಟ್ಟೆ, ಮನೆಯ ಸಾಮಾನು ಸರಂಜಾಮು ಎಲ್ಲವೂ ಭಸ್ಮವಾಗಿದ್ದುದನ್ನು ಪೂಜ್ಯ ಸ್ವಾಮಿ ಜಪಾನಂದಜೀ ಮಹಾರಾಜ್ ರವರು ಕೇವಲ 24 ಗಂಟೆಯ ಒಳಗೆ ಅವನ ಸ್ಥಳಕ್ಕೆ ತೆರಳಿ ಅಲ್ಲಿಯ ಧಾರುಣ ಸ್ಥಿತಿಯನ್ನು ಸ್ವತಃ ಕಂಡು ಮರುಗಿದರು. ಎಂದಿನಂತೆ ಆಶ್ರಮದ ಮೂಲಕ ಒಂದು ಕುಟುಂಬಕ್ಕಾಗುವ ಅಡುಗೆ ಪಾತ್ರೆಗಳು, ತಟ್ಟೆ ಲೋಟಗಳು (ಸ್ಟೀಲ್), ಹಾಗೂ ದಿನನಿತ್ಯಕ್ಕೆ ಬೇಕಾಗುವ 20 ಕೆ.ಜಿ. ಅಕ್ಕಿ ಹಾಗೂ ಸಕ್ಕರೆ, ಸಾಂಬಾರು ಪದಾರ್ಥಗಳು, ಬೇಳೆ, ರವೆ ಇತ್ಯಾದಿಗಳ ಚೀಲವನ್ನು ನೀಡಿದರು. ಅಂತ್ಯದಲ್ಲಿ ಆ ವಯೋವೃದ್ಧನಿಗೆ ಒಂದು ನೂತನ ಹೊದಿಕೆ, ಬೆಡ್ಶೀಟ್, ಟವೆಲ್, ಪಂಚೆ, ಕಂಬಳಿ ಇತ್ಯಾದಿಗಳನ್ನು ನೀಡಿದ್ದರ ಜೊತೆಯಲ್ಲಿ ಅವನಿಗೆ ಬೃಹತ್ ಅತ್ಯಾಧುನಿಕ ಟಾರ್ಪಾಲನ್ನು ನೀಡಿ ಅವನ ಪುಟ್ಟ ಗುಡಿಸಲಿಗೆ ಅಚ್ಚುಕಟ್ಟಾಗಿ ಅದನ್ನು ಹೊದಿಸುವಂತೆ ಅಲ್ಲಿಯ ಗ್ರಾಮಸ್ಥರಿಗೆ ತಿಳಿಸಿದರು. ಅವನ ದುಸ್ಥಿತಿಯನ್ನು ಕಂಡು ಒಂದು ನೂತನ ಪಾದರಕ್ಷೆಯನ್ನೂ ಸಹ ಹಸ್ತಾಂತರಿಸಿದರು. ಆ ಸಂದರ್ಭದಲ್ಲಿ ಕಣ್ಣೀರು ಸುರಿಸುತ್ತಾ ವೃದ್ಧ ಸ್ವಾಮೀಜಿಯವರ ಪಾದಾರವಿಂದಗಳನ್ನು ಹಿಡಿದು ತನ್ನ ಭಕ್ತಿಪೂರ್ವಕ ಕೃತಜ್ಞತೆಗಳನ್ನು ಸಲ್ಲಿಸಿದನು. ಈ ಎಲ್ಲ ಸಾಮಗ್ರಿಗಳು ಸರಿಸುಮಾರು ರೂ.12,000/- ರೂ.ಗಳಿಗೆ ಮೀರಿತ್ತು. ಈ ಸಂದರ್ಭದಲ್ಲಿ ಸ್ವಾಮೀಜಿಯವರ ಜೊತೆ ತುಮಕೂರು ಜಿಲ್ಲಾ ರೈತ ಸಂಘದ ಅಧ್ಯಕ್ಷರಾದ ಶ್ರೀ ಪೂಜಾರಪ್ಪನವರು ಉಪಸ್ಥಿತರಿದ್ದರು. ಪೂಜ್ಯ ಸ್ವಾಮೀಜಿಯವರು ಗ್ರಾಮಸ್ಥರ ಪ್ರೀತಿ ಹಾಗೂ ಅವರ ಗೌರವಕ್ಕೆ ಮಾರು ಹೋದರು. ಗ್ರಾಮಸ್ಥರು ಸ್ಥಳೀಯ ದೇವಸ್ಥಾನದಲ್ಲಿ ಪೂಜ್ಯರಿಗೆ ಫಲ ಪುಷ್ಪವನ್ನು ಸಮರ್ಪಿಸಿದರು. ಪೂಜ್ಯ ಸ್ವಾಮಿ ಜಪಾನಂದಜೀ ರವರು ಮಾತನಾಡುತ್ತಾ ಸ್ವಾಮಿ ವಿವೇಕಾನಂದರು ತಿಳಿಸಿದ ಭೋಧನೆಗಳ ಅನುಷ್ಠಾನವನ್ನು ತಾವು ಸದಾ ಕೈಗೊಳ್ಳುತ್ತಾ ಮೇಲಾಗಿ ತಮ್ಮ ಪೂರ್ಣ ಜೀವನವನ್ನೇ ಸ್ವಾಮಿ ವಿವೇಕಾನಂದರ ಆದರ್ಶಗಳ ಅನುಷ್ಠಾನಕ್ಕೆ ಸಮರ್ಪಿಸಿಬಿಟ್ಟಿದ್ದೇನೆ ಎಂದು ತಿಳಿಸಿದರು.
